【头条独家】硬撼千嬅小红争视后 朱晨丽狂呻压力大：只求唔好输得咁惨

朱晨丽(朱朱)于刚刚播完剧集《多功能老婆》中演「十三点」阔太思蕾，尤其怀疑老公有「小三」爆喊场口，演技受赞赏，人气爆登㗎！连网民都封她做「女神」。而喺TVB台庆颁奖礼中，她就硬撼杨千嬅、惠英红、李施嬅、唐诗咏等力争视后及「最爱欢迎电视女角色」。她哈哈大笑说：「真系好似发紧梦咁，我好大压力，希望唔好输得咁惨啦！不过，无论系点，我好记得千嬅妈咪提示过我话：『一系唔好做，一做就要做到最好！』呢句话对我影响好大，我受教喇！」 采访：方骞平 服装：Magazzin Group 化妆：Soie IP 发型：Franco Chung @Leonardo 3 Hair corner 场地：la bo la @ Lee Tung Avenue

入行8年，前期朱晨丽因为未装备好自己，一度好惨咁坐冷板櫈，冇工开。不过，经过一番努力下，𠵱家发展得愈嚟愈好，凭住剧集《多功能老婆》嘅出色演技，成功上位成为TVB姐仔，朱朱笑得好开怀话：「好感恩公司畀到我咁大嘅鼓励，令我有努力嘅动力，我谂以后要双倍努力去备课睇剧本。其实有段时间裹足不前，我曾经怀疑过自己系咪唔啱做呢行呢？检讨过后原来系自己做得唔够好。今次拍《多功能老婆》跟杨千嬅同陈炜戏里戏外做咗好姊妹，尤其千嬅好犀利，好羡慕佢能够同时兼顾到事业同家庭，简直系人生胜利组，人生幸福美满。不过，就算上天畀佢条件，我见佢真系好努力。记得有次我去睇佢演唱会时，有机会同千嬅妈咪交谈，千嬅妈咪提示我：『一系唔好做，一做就要做到最好！』呢句话我铭记于心！」  

未敢夺视后
今年台庆颁奖礼朱朱有份提名角逐「女喜」及视后，好得宠。两年前朱朱凭攞到《超时空男臣》「女配」，问她可有信心再下一城，晋阶视后？她哗了一声说：「奖项呢啲讲机缘，我只系尽力做好角色，获提名经已好开心，心目中千嬅、小红姐先系视后，但唔紧要，人生有高有低，咁样先知道点样可以企返起身，最重要做好本份，我会为佢哋打气。」