【头条独家】63岁仲系好型　刘天兰教授级试眼影

有「香港时装教母」之称的刘天兰（Tina），不单止出名穿搭有品味，年届63的她对化妆亦好有研究，仲好鬼讲究𠻹！早前，她独自到中环SEPHORA买化妆品，其间于一个眼影专架驻足30分钟，仲试色试到好似想哄落个鼻度「闻」咁款，非常仔细，最终使咗唔够200蚊便扫走两盒Eyeshadow。采访：李维隆

刚于元旦踏入63岁的刘天兰，廿岁获选温哥华华埠小姐冠军，曾担任Model、化妆师，又做过杂志编辑、形象及服装指导，故即使已经6字头，但都仍然好潮、好识打扮、近年仲积极做运动养生，难怪睇落同35岁歌手女儿岑宁儿十足姊妹咁，Keep得劲好！

专注拣化妆品
早前又圣诞又除夕倒数，咁多Party要去，当然要Shopping采购一下至新妆品，将自己扮到有咁靓得咁靓啦！日前，Tina到中环IFC的SEPHORA行街，一头招牌短发加粗框眼镜的她，穿上米白色长褛衬蓝衫、黑裤，在一群淑女中显得分外型格！一入到铺头，Tina目标都好明确，直接杀去SEPHORA专柜，她先翘晒手劲专注地Scan个货架，冇耐终于Target到Eyeshadow一栏，仲逐只色捽埋上手试𠻹，之但系……做乜无啦啦系咁闻只搽咗眼影嘅手呢？原来只系想摆近块面再照镜试真啲啫！

Tina果然系一个好精明的消费者，就算眼影只售70蚊都绝不马虎，精挑细选15分钟，以为畀完钱就走得啦，点知Tina心大心细又走番转头，再Loop一次刚才拣色的过程，结果扰攘多15分钟，最终一共扫了2盒眼影，200蚊都唔使，抵到烂呀！