【头条独家】 视演出为人生一大祝福 潘源良望Sammi夺影后
2019-12-20 00:30 
潘源良最近在执导电影《圣荷西谋杀案》跟Sammi郑秀文合作，他坦承女主角非Sammi莫属，更直言冇对方电影拍唔成，还认为Sammi出色演出是他人生一大祝福，若对方能凭此片夺影后殊荣，比自己得奖更开心。另外，谈到新婚太太Rita，他大赞对方是最好的选择，令身边人都好开心。撰文：杜淑霞 摄影：李权威 场地：英皇钟表珠宝中环旗舰店
潘源良认为将庄梅岩编写的同名舞台剧改编成电影是最好选择，「因为人物比较简单但丰富，加上成个故仔发生喺外地系一个优势。」他亦坦承女主角非Sammi莫属，「佢再后生啲演唔到，佢𠵱家有咁嘅经验，有咁嘅年岁，唔需要太背叛原著，若果佢唔演都唔知点搵人，个计划要摺埋，同佢倾时佢好开心，佢锺意一啲复杂有挑战嘅角色，大家叫做一拍即合。」
太太为理想选择
完成作品后，潘源良更加觉得无拣错女主角，「直情系我人生一大祝福，呢套戏其他演员好似上天嘅安排咁，譬如林嘉华、佟大为同阿Sa（蔡卓妍）都演得好好。」他更希望Sammi凭电影荣登影后，「梗系希望！但系好衰嘅奖项问题，硬系有啲人锺意唱反调，就算做到不能再好，但总系有人话『有几好呀！』要搞到爆冷先过瘾嘅，我希望今次唔会啦！（但提名应该唔难？）如果提名都唔得，我真系对呢个圈有小小心灰意冷。」他更坦言Sammi得奖比自己得奖更开心，「一定开心过自己攞，导演再叻都要靠演员去做。」
谈到9月时在加拿大结婚的太太Rita，他直言新婚生活相当愉快，又话：「开心系一种选择嚟。」86年跟前妻离婚，跟李丽珍离离合合多年，为何Rita令他有成家谂头呢？他说：「Follow your heart！觉得会好、会开心、会正面，令到身边周围嘅人，包括我屋企人，包括我家姐开心嘅理想选择。（之前冇谂过？）之前未曾到嗰个阶段。」
最新回应