【头条独家】拍住麦包金刚做主持 ViuTV新丁蔡宝欣紧张到爆喊
2019-12-19 20:00 
去年参加ViuTV《广告女皇》夺得季军的蔡宝欣（Pony），除了做娱乐新闻《十五分钟热度》主持外，最近仲有机会拍住麦包（麦长青）和金刚主持真人骚节目《C9旅行团》，跟两位前辈同成班师奶去台湾拍外景，Pony坦承超紧张，期间更因自己表现唔好即场爆喊，但两位前辈反而安慰她，令她相当感动。采访：杜淑霞
加入ViuTV后，Pony先演出综艺节目《我食饭你埋单》，以及最近主持《十五分钟热度》，今次《C9旅行团》才算正式主持工作，「《我食饭》我只系个助手仔嚟，唔算系主持，而《十五分钟》就主要系出外景访问艺人，都唔系正式嘅主持工作，所以知道今次真系负责主持，有呢次机会真系开心又紧张。」
麦包有爸爸feel
Pony觉得紧张除了有机会正式做主持外，当然要面对两位经验丰富的前辈亦是主要原因，「知道同麦包、金刚合作，最初真系好紧张，特别系麦包好似有啲严肃咁，不过识落佢反而好似爸爸咁好照顾人，喺台湾时我贪玩坐电单车尾，点知畀死气喉『辣』到起咗个大水泡，收工时佢仲专登陪我去买药，真系好好人。」
正因为前辈咁照顾，Pony更加想做好啲，反而畀自己更大压力，最终情绪失控爆煲，「我其实每晚返酒店房都有检讨返，但系始终谂唔到点样可以做好啲，去到中段有日食午饭时，忍唔住行咗去海边喊，本嚟喊完继续开工，但系见到麦包佢哋我又忍唔住喊过，又同佢哋道歉自己做得唔好，佢哋冇怪我仲安慰我，之后拍摄更加畀多啲位我发挥，所以真系好多谢佢哋两个咁照顾同埋体谅，希望嚟紧节目再有续集可以跟佢哋再学嘢。」
最新回应