【头条独家】泰国直击拍贺岁片《大盗演》首演人妻乐瞳望升呢扮埋人母

2019-11-27 23:00

乐瞳早前参与贺岁片《大盗演》，更获该片监制李璨琛（Sam）钦点演其分居太太，她在泰国曼谷拍摄期间，大赞这次合作好开心，仲话唔介意升呢做人妻，甚至做人母一样冇问题，只希望自己演员路可以更多样化。另外，刚通过品酒师试的她，更计划创业，经营跟酒有关生意，为演艺之外开拓更多搵钱商机。采访：杜淑霞

乐瞳话今次有机会参与该片，绝对要多谢李璨琛提携，「我本身唔识Sam哥，系之前导演会见过，当时都冇乜交流，点知冇耐就收到邀请，到我入咗剧组听啲工作人员讲『你真系要多谢Sam哥，系佢一定要你做佢老婆㗎！』所以真系好多谢佢畀呢次机会我。」

唔想再演妹妹仔
至于首度跟阿Sam合作，乐瞳她大赞对方有风度及识照顾人，「以前会觉得佢几𡃁仔，但可能佢依家有咗囡囡，佢真系好识照顾人，好似担心会疏忽照顾我咁，会问住我食唔食饭，镜头前佢又会同我有商有量，真系好gentleman。」讲到首次演人妻，乐瞳一点都不介意，仲好开心话：「我本嚟谂住减啲肥先拍，点知嚟到泰国日日都好多好嘢食，唯有当人妻有啲幸福肥啦！哈哈！Sam哥接受到嘅！其实做人妻我冇所谓，就算做人母都接受到，平日都有帮朋友照顾吓小朋友，应该胜任到，其实自己都唔想成日做啲妹妹仔角色，希望可以做啲成熟啲，角色可以多啲变化，跳出嚟都系想多啲唔同嘅发展。」刚通过品酒师试的她，更计划创业，「想同朋友搞啲同酒或者美容有关嘅小生意，始终呢行比较被动，同埋仲后生想学多啲嘢，发掘更多搵钱商机。」