【頭條獨家】泰國直擊拍賀歲片《大盜演》首演人妻樂瞳望升呢扮埋人母

2019-11-27 23:00

樂瞳早前參與賀歲片《大盜演》，更獲該片監製李璨琛（Sam）欽點演其分居太太，她在泰國曼谷拍攝期間，大讚這次合作好開心，仲話唔介意升呢做人妻，甚至做人母一樣冇問題，只希望自己演員路可以更多樣化。另外，剛通過品酒師試的她，更計劃創業，經營跟酒有關生意，為演藝之外開拓更多搵錢商機。採訪：杜淑霞

樂瞳話今次有機會參與該片，絕對要多謝李璨琛提攜，「我本身唔識Sam哥，係之前導演會見過，當時都冇乜交流，點知冇耐就收到邀請，到我入咗劇組聽啲工作人員講『你真係要多謝Sam哥，係佢一定要你做佢老婆㗎！』所以真係好多謝佢畀呢次機會我。」

唔想再演妹妹仔
至於首度跟阿Sam合作，樂瞳她大讚對方有風度及識照顧人，「以前會覺得佢幾𡃁仔，但可能佢依家有咗囡囡，佢真係好識照顧人，好似擔心會疏忽照顧我咁，會問住我食唔食飯，鏡頭前佢又會同我有商有量，真係好gentleman。」講到首次演人妻，樂瞳一點都不介意，仲好開心話：「我本嚟諗住減啲肥先拍，點知嚟到泰國日日都好多好嘢食，唯有當人妻有啲幸福肥啦！哈哈！Sam哥接受到嘅！其實做人妻我冇所謂，就算做人母都接受到，平日都有幫朋友照顧吓小朋友，應該勝任到，其實自己都唔想成日做啲妹妹仔角色，希望可以做啲成熟啲，角色可以多啲變化，跳出嚟都係想多啲唔同嘅發展。」剛通過品酒師試的她，更計劃創業，「想同朋友搞啲同酒或者美容有關嘅小生意，始終呢行比較被動，同埋仲後生想學多啲嘢，發掘更多搵錢商機。」