【头条独家】跟妈咪去Shopping 李璨琛网红B女超萌放电

去年屋企多咗个happy baby嘅李璨琛好幸福外，储落近10万粉丝嘅网红B女元元亦带畀好多人欢乐。近日，人夫首先监制贺岁电影，同金像影后曾美慧孜、泰沛等于泰国开工，李太就主力凑女啦！日前傍晚，高瘦李太约咗女友人带网红B女行铜锣湾利园。妈咪挂住拣衫仔时，肉丸妹好开心咁拎住两个汽球喺商场放电，打扮可爱嘅元元不停笑笑笑，真系冧死人！   采访 : 梁志明

多得李璨琛（Sam）同佢爱妻梁志莹养肥可爱B女，囡囡元元人如其名圆碌碌，cute到爆炸。日前傍晚6时，阿Sam要赶拍新戏，岁半B女元元又无时停，李太就凑万人迷B女出街放吓电。当日，人妻约咗女友人一齐行利园童装楼层。当李太睇紧高级童装时，托友人帮手睇住肉丸妹。着上连身长裙嘅齐荫元元打扮加晒分，可爱B女两手拎住汽球猛fing，玩到眯晒眼仔，劲兴奋。其间有途人夫妇嘅B女，无论年龄、外貌都同元元激似，遂停低让两个萌爆B女一齐玩。做惯写真小天后嘅肉丸元元唔怕生保，向B女大方送上手上汽球，两B玩咗一轮，再影番张twins合照才say bye走人。

玩波开心猛笑
逗留一小时，李太买咗两件衫仔后就拖宝贝女去附近一间台湾菜馆食饭。见人妻向爱女细心喂面，惜元元扭计拧头唔肯食。妈咪唯有出绝招，拎出私伙紫菜，再剪碎畀阿女慢慢嗒。食饱饱，三女步出门口，女友人抱住放晒电想瞓觉猪嘅元元，李太就截的士，然后齐齐回家。