【头条独家】观众劲赞 《牛下》翻生收视高执身彩 吴岱融 张振朗唔怪黄心颖

TVB剧《牛下女高音》播出唔够两星期，不但口碑唔错，最高有成27.1收视点，身为主角的吴岱融同张振朗当然开心。其实呢套剧一度因为黄心颖的偷食事件，搞到变成仓底货，仲谂住搵江嘉敏补拍过先推出，估唔到依家成功翻生做埋台庆剧，仲有咁好成绩添！虽然个剧咁多波折，学岱融哥话斋「真系似坐过山车咁！」但系问到佢同张振朗有冇怪过黄心颖累街坊，佢哋都异口同声话：「真系冇怪过佢！」凭该剧成功破咗「地狱黑仔王」恶名的张振朗，仲话睇嚟套剧条命好硬，咁大家嚟紧就睇吓收视，可唔可更上一层楼啦！撰文：杜淑霞 摄影：李维隆

岱融哥话最初收到该剧剧本时，已觉得系妤嘢嚟，「真系要赞吓编审龙文康，佢真系写得好好，除咗难得用中佬做主题，内容仲够晒贴地，演起嚟都容易投入好多，相信观众睇起嚟都好易有共鸣。」讲到角色「大爆」，他都认为同自己几似，「我对住老婆都系报喜不报忧多，好似『大爆』咁都系唔想佢担心啫！（系咪都咁怕老婆？）我哋呢啲系尊重。」不过讲到「阴柔」，佢就强调：「我谂每个男人都介意人咁讲，所以话个剧讲出好多男人心声，贴地罗！」

中佬合唱团齐搵银
该剧本来惨被黄心颖连累变仓底货，岱融哥坦承：「真系好似坐过山车咁，拍嘅时候好开心，点知又话播唔到，后尾又变咗台庆剧喎！心情真系好似坐过山车咁㗎！」不过他无对心颖不满，「真系冇怪过佢，都唔到佢控制嘅。」讲到个剧成绩好，他都觉得好开心，仲希望可以多啲这种题材剧集，「暂时剧集口碑同收视都不俗，都希望可开拓中佬主题嘅剧，其实中佬有好多故事可以讲。」他更想剧中的中佬合唱团可以继续维持落去，「我哋一班中佬合作得好开心，平日通常分开合作，对手戏又唔多，今次大家真系过足戏瘾，呢个合唱团现实可拍住演出，搵埋真银就更加好啦！」

张振朗坦承最初个剧播唔到，仲畀人封做「地狱黑仔王」，不但冇怪心颖反而谂系咪自己问题，「嗰时都有担心系咪自己累街坊呢？但依家播到仲做埋台庆剧，我成功破咗地狱啦！但我真系冇怪过心颖，我哋系朋友，冇佢呢个咁合拍嘅对手，唔会有咁多火花，我哋互窒啲戏，系一齐度出嚟，好似有场戏我仲突然将成个橙塞入佢个口度，佢个反应好真实，要大家好熟先做到。」讲到每个剧都有佢条命，他即搞笑说：「咁呢个剧条命好硬！」

开到口恨唱主题曲
对于《牛》剧中唱《一生何求》获好评，他坦承恨有多啲唱歌机会，所以希望自己有份演的剧都顺利出街，特别是首部担正的《坚离地对坚离地》，「听讲会喺马来西亚播先，呢套剧我瞓晒身去演，仲第一次唱埋主题曲，所以特别想佢出到街。」32岁的张振朗又指跟26岁女友杨偲泳，会互相支持对方作品，虽然早前被传媒影到见埋家长，感情稳定，但暂时未有结婚打算，「我哋依家仲系事业搏杀期，有车有楼先谂结婚啦！」经常在社交网放凑侄仔日常的他，坦承好锺意小朋友，将来一定做老窦之馀，仲话拍剧都想过吓老窦瘾，「除咗做癫佬、奸角外，我好想试吓演好似《阿郎的故事》嗰啲咁嘅老窦，成日整蛊吓个小朋友应该几有火花㗎！」