【头条独家】 Quit社交网 退下火线 黄秋生队啤开心吹水

三度获封影帝嘅黄秋生，喺社交网志好活跃，不时发表大胆言论，直肠直肚。但早前佢却突然宣布「弃玩」，坦言觉得好攰，跟大家说再见。其后，秋生火速转玩纯英语嘅社交网，感觉更自由同和平，一身安乐晒啦！日前晚上，呢位艺术家脾气嘅影帝约咗男女友人去大坑饮酒gathering。见戴上牛仔帽嘅佢，吹水3小时好风骚，笑容满面又手郁郁，似足开talk show。 采访 : 李维隆、张咏森

集影帝、视帝、剧帝于一身嘅58岁黄秋生，早排同梁祖尧、徐天佑等演出舞台剧《寻常心》后，又为好朋友嘅《林海峰是但噏Happy Monday 2019》做特别嘉宾。在Encore嘅party环节上，见秋生胀咗成个码、穿上金色西装现身红馆舞台，化身「黄经理」声嘶力竭大唱rock歌，又表演口风琴。尾场顺利演出过后，Jan仲爆秋生第一次彩排后，细细声跟佢讲可以搞个演唱会，不过秋生听罢即说已打消念头，大呻唔容易。


近日转玩纯英语社交网嘅秋生，坦言：「It's more freedom，peaceful and reasonable here(意指更自由及和平等)。」做人更轻松自在，平日一脸严肃嘅佢笑容自然多咗啦。日前晚上8时左右，见秋生戴上牛仔帽、英气十足咁同女助手Moon、以及一男一女友人去大坑嘅酒吧happy hour。面向大街坐嘅秋生一边队啤；一边happy吹水，唔经唔觉已畅饮几杯。酒精落肚，秋生表现宁舍风骚，开始手郁郁，指手划脚大动作倾偈，只见中女友人和长发男友人不时点头大笑，似乎好认同秋生说法。

High到除帽散热
一行四人食吓小食叹啤酒，男女友人不时行出门外食烟叉电，但秋生3个钟只食了两支烟，烟瘾明显唔大。其间，秋生饮到面红红，要除帽散热。直至11时许，众人起身走人，有酒客趁机搵影帝合相，秋生都来者不拒，影完齐齐行去街头搭的士，长发男友人送秋生及两女上车后再独自离开。