阿碌开咪｜好彩打咗三针

近日凡经过屋邨公园仔，都听到不少老人家在呻：「唉，一家又一家茶楼关门，冇得饮早茶，真系……再加上又冇得见『Soon仔』。政府又话打咗针就可以『饮茶见Soon仔』。结果两样都冇，又闷又无聊，唔知点打发日子！」

小弟也如是，发觉近日土瓜湾食肆关下一家，关下又一家，已经再难有选择矣，冇晒瘾。

幸而靠背垄道仍有一家连锁的，顶得住。不过，前朝七点踏入，见到部长阿姐鬼食泥咁款：「呢个又话确诊，嗰个又话紧密接触者，仲有个竟然话心情差唔想返工。如今得返两丁友，点顶咁大个楼面啊？一于做埋你暂停堂食，只做外卖嘞……（下删五百字苦水）」跟着，见佢猛打电话搵帮手。终于半小时后，有两个临时工肯返，先再次开堂食。

其中一位相熟肥妹妹落完单，同我讲：「碌Sir，几日冇见，你估下我发生乜事呢？讲畀你听，写出嚟可能帮到部分读者安心㗎！」

原来五日前佢收工返家，哥哥同佢讲：「阿妹，有同事确诊，不如一齐做快速测试啦！」

两个人「队」鼻，十分钟后一睇，哎吔吔，一同显示两条红綫，即系中咗！唔使惊，冇发烧，又冇喉咙痛，速速服必理痛，饮大量热水，上牀瞓。

一宿无话，第二朝两个都有微烧，喉咙少少痒，但冇乜唔舒服。一于按衞生署指示，自我隔离，请阿妈煲姜茶饮，继续休息。

如此，第三日朝，已明显好转，发烧及喉咙唔舒服皆减退。继续服必理痛，饮热水及姜茶，再瞓瞓瞓！傍晚起牀快速测试——阴性。Yeah！

终于第四日起牀乜事都冇，精神晒，再快速测试。早一次，阴性，晚一次，又阴性，搞掂！

就此，第五朝女部长嗌救命搵帮手，佢立即返工。

「碌Sir，中招，根本唔使惊，亦唔使冲急症室，自己搞掂已可。不过，声明啊，我打足三针㗎（佢豪气展示手瓜，信心十足咁款）！」

曾智华

阿碌开咪