阿碌开咪｜唔麻醉，电你只牙！

人的一生，当然要见N加N次各类医生。

众多专科医生之中，你最怕见边科呢？小弟不少朋友一致回答——牙医！

因为，一瞓上牙医椅，就似坐电椅，等待「行刑」。由最轻的洗牙或补牙，到最重的剥牙（各种，包括要搏斗似的拔掉智慧齿！），又或磨牙……总之，冇一样不似行刑。

最弊，牙医用的工具，也非常得人惊，又磨又撬又拔又钻……仲有，发出的「吱吱」声，也极吓人。所以，十之九九病人一坐上牙医椅，神经系统立时绷紧，双手互捏，希望时间快点过。

我的睇牙生涯中，最大大大镬一次为补牙。唔知点解，医生竟问我：「曾先生，需唔需要打麻醉针呢？」

当时，小弟完全冇补牙经验，觉得，既然佢问到，当然不一定要打啦。于是，「大丈夫」上身：「唔打都得！」答完大安旨意，哗！原来后果绝对没齿难忘，因实在令人极度震惊！

医生开动电钻，将牙窿钻阔。攞大命，十级痛楚，忍到标尿。因又赤又痹又痛！老友，咁钻落牙肉内的神经綫，怎不痛到黐孖筋？

呢次教训，深入脑海。以后，牙医唔问，我都主动提出：「请打麻醉针。」

前日，又因牙痛，被逼去「行刑」。瞓在椅上，照例要求医生：「唔该打麻醉针！」

点知，医生略一皱眉，非常有礼貌及耐性回应：「曾先生，今次唔得。因为，我要试试你只牙有冇『死』到！『生』的牙，内藏活着的神经线，可以测出反应。『死』的，则冇反应。 所以，唔可以落麻药后再试。嗱，我会先电你只牙，痛就举手！然后，我又会磨下只牙，同样，赤痛就举手！」

跟住，大刑侍候！佢唔知用乜工具，真系一电即痛。哗！急急举手，以免佢嚟多嘢。然后，又用磨牙工具猛「吱吱」声磨。哎吔吔，痹晒赤赤痛，又再急急举手。

「恭喜你呀曾先生，经过两次测试，证明你只牙仍生存，冇死到。所以，可用其他方法保住佢，希望再用多几年啦！」


曾智华

阿碌开咪