【阿碌开咪】由唔打到打咗

　人，一般都有羊群心态。投资如是，移民如是（上世纪八十年代最明显，尤其艺人，唔移一移好似冇晒江湖地位咁款），理所当然，打疫苗也如是。

　　我有N个饭局群组，定期聚会分享美食、分享见闻，当然，也分享生活感受。

　　发觉，几乎个个群组四个月前话题，只集中三个范围：一、移唔移民；二、打唔打针；三、装唔装安心出行。

　　当时，三条问题超过七成答案为：一、都要谂谂嘞；二、唔打！都唔知有乜反应；三、唔装！为乜要畀政府知我去过边度喎，毫无私隐！

　　三条问题，四个月前我的答案：一、唔移！移过一次就知自己有几「嘟」锺意香港。移民于我就似咸水鱼跌入淡水湖，好快窒息而死！二、可打即打。因睇唔到人人唔打的话，社会如何能够回复正常。对，打疫苗可能有副作用，但衡量保护自己保护他人，加上，所有疫苗都要由「志愿者」先行先试，我愿接受！三、唔装，嫌烦兼有多少反叛心态。

　　好嘞，四个月后又如何？结果，答案由七三比变三七比。个个慢慢改变看法与态度，羊群效应出现。

　　如今，同是那N组人，七成答案系点呢？一、谂落都系唔移民嘞。中美交恶升级，费事去到西方世界畀鬼佬仇视啦。又唔知有冇野做，睇定啲先嘞；二、打咗喇，唔打又惊自己领野，更惊传畀家人，打咗复必泰嘞！

　　安心出行又如何？小弟声明，我已转軚请肥妹老婆同我Download咗。因为，第一、出出入入填纸仔，烦到抽筋。

　　第二、其实，若唔想畀人知去过边容乜易啫，唔「嘟」咪得罗——有得拣，先至系老板！

　　若我的「饭局组」反映大部分心理取态的话，移民、打针及安心出行三大问题，应接近尘埃落定矣（必须声明，我的全部是「老是佛」人马！）。香港人，大把野玩，下次「羊群」玩乜？应该玩选立法会及向特首人选表态嘞（冇得选都要发声！），且看结果又如何？

曾智华

阿碌开咪