【阿碌开咪】良禽择木而栖

近半年，香港有个难以解释的怪现象，唔多合逻辑，但事实则摆在眼前。

乜呢？正是在移民潮不断涌现，经济尚未复原，失业率仍然高企的情况下，楼价竟然继续升呀升。

大家认识的年轻中产，总有十个八个家庭已经或正在部署移民。呢支大军，冇十万都有八万啩，部分有自置物业，理应要抛售才够钱移民者，但点解个市唔跌？

新楼更抢手得夸张，喂，疫情仲未过喎！

会唔会有啲现象，我哋唔知的呢？例如，大家只睇到不少人移民走，究竟可有香港人回流呢？

我冇数字，唔知。只知有位多年老友「大木」，正是如此，佢话回港乃「良禽择木而栖」喎。

多年冇见，约晚饭，之前大家有默契，唔好拗政治！点解？因「大木」看法有如大量早早移民美加澳的香港人，虽然早早「投奔自由」，变晒美国、加拿大及澳洲人，但奇，竟冇几多个认同西方价值观，反之，全部支持中国共产主义。

呢班外国人，点解会咁矛盾的呢？我也曾居住美加，小小观察。呢群香港老移民，当年走并非谂住「爱」落籍的国家，而是十之八九为搵食或「买个保险」。不过，去到外地，才发现「人哋嘅国家永远系人哋嘅国家」，当地人，尤其美国人，一定歧视有色人种。

近年中国国力崛起，老移民心态——「我哋终于强大起来了」！这个「我哋」本与自己外国人身分直接冲突，但大家心底皆知，自己点可以真正「变籍」，又或人哋会真心接受你「变籍」呢？移民海外者认中情感特别强烈，可以理解。但发展到与香港不少主流意识「水火不容」，则未免令人有点意外。

回说「大木」回流。「你知我知，中美关系紧张，势必升级。美国佬当然继续妖魔化中国人，住在当地，愈来愈危险！我既认同中国，又觉得香港安全，咪全家移返嚟，迟下再上大湾区搵食罗，肯定掂过碌蔗！」

至于佢仲做唔做「美国人」，免问，费事反面！