【阿碌开咪】人山人海换回乡证

近日碰口碰面老友都会问：「有冇攞BNO？」似乎已成一个潮流。

我又如何？基于真系好「嘟」锺意香港，乜国籍都冇兴趣，一于坐定定唔郁，继续「享受香港」！

反而疫情就快过去，极之思念全球包括内地美食。得闲无事攞张回乡证一睇，咦，原来已过期半年，咁……若开关，咪冇得第一时间返内地叹Good Food？当下立即上网睇睇点换证先。

如今乜都讲效率、讲科技。以前申领回乡证，烦到震。如今？上网填晒表格，再预约，方便。但点都要亲身去两次——申请证及取证。家住近旺角，就去旺角中旅社啦。但见门口有条人龙，中年阿姐大大声嗌：「申请证要先影相及填检疫报告，入大厦内行到尾啦。」

咦……乜唔系中旅社内有得影咩？不过，见人人去，我又去罗。小铺之内，放低三十蚊。

「除口罩除眼镜！坐定定望镜头！」职员指示。

影完，企在门口等。老板不停嗌：「上边有扒手，大家贵重财物放胸前！因会用????刀????袋！」

哗！讲到中旅社贼窦咁款，唔该旺角警区派卧底去扫场！

相片晒出，核核突突（拍到似僵尸！），连检疫表，再排队入中旅社。行上二楼，因戴住口罩，呼吸唔畅顺，制服女职员好有礼貌讲：「阿叔，唔使急，我教你点做啦，全自动化㗎。」

对上一次来领证，边有咁好服务？社会真是已经进步了。以前的「国产味」，虽从装修到制服仍非常浓，但起码冇咗「做又三十六，唔做又三十六」的面口。

做完自助程序，持号码等埋柜位，人手对一次资料，确认无误，再一次面对镜头Double Check面容及核对签名，柜员效率甚高，两分钟完成：「曾先生， 三月五日凭票来自助取证啦！」

相比以前，改善不少，虽人山人海（全部五十岁以上中年人），但流程畅顺快捷。

离开时发觉，咦，果然有自助拍照服务，不过，要五十元，贵过商场小铺四成，食水极深！

曾智华

阿碌开咪