【阿碌开咪】上法庭记

　　久不久上法庭，会见到好多人生百态。年前到高院抽陪审员，笑到碌地，因被抽中者十之七八唔想做，于是作N个理由「呃」法官，部分演技出色过骨，部分则被踢爆兼被法官省到一面屁，笑死人。

　　最多系带埋医生纸，唔知真病定假病。

　　呢，上周小弟又有机会到法庭。因一宗单位外水泵铁架唔合规格，搞呀搞，终又要到西九龙上庭。有几个观察，过瘾。

　　一、屋宇署黑衣大汉。一上到法庭外，几个黑色西装友立即走埋嚟问：「请问你系咪上庭？」

　　呢种环境，我以前在医院见得多。个心打突，直觉佢哋系「老Sell」。反问：「请问你系边位？有乜职责呢？」对方礼貌周周答：「我哋系屋宇署检控组嘅，负责控告你的。麻烦畀法庭信及身分证我对对啦。」

　　然后佢详细解释审讯流程：「曾先生，好快就完成㗎嘞。」（好似O氹BB打针。）难得告人嘅咁有礼貌，模范公务员呀。

　　二、法官又系佢。入到法庭，等呀等，等咗约四十分钟，见到法官步出。咦，乜咁面善？原来法官是「万能士」，上周报章见佢刚刚审完反修例刑事案，一转身，僭建呢类咁闷湿碎案又要审。

　　法官大人也算是斯文有礼，见到啲摆明想「误导」佢嘅被告，颇有耐性。例如明明有工做扮冇工做，博可怜，罚少啲。法官日日见N种被告，一听已知对方扮野，只严肃劝佢：「从实招来！」果然扮冇收入者都有万几蚊一个月。

　　我上过交通案庭，又上埋僭建庭。见证呢类案件，香港千千万万，变化不大。日日流水作业式审讯，其实都几「厌恶性」，难得眼前个官又几投入。

　　三、钓鱼保安员。个官投入啫，但午饭后，庭上两个肥佬护卫员饭气攻心。日日听都系「三幅被」，全部僭建或交通案皆湿湿碎碎。律师及法庭文员也是机械式读出案情，人人按程序走过场。咁鬼闷，点可以唔钓鱼吖？两肥可能日日搣大髀提自己：「喂，唔好瞓呀！」

曾智华

阿碌开咪