【阿碌开咪】呢班友是否黐咗綫？

上周四早上七点，又夹大叠报章到土瓜湾茶记叹早餐，照旧见到两枱共四位的士司机，开工前旁若无人大大声来个《城市论坛》。　

通常佢哋噏乜唔会影响我，因噪音听惯，会变「好似冇声」咁㗎（老婆大人的????哦也如是）！这个有点似孔子名言：「与恶人居，如入鲍鱼之肆，久而不闻其臭，亦与之化矣！」事实班友早上纯粹发泄，乜都闹餐饱，通常为闹而闹，根本冇Point。

不过，当朝突然有一句，立即令我耳仔似被摄住，正是：「呢两个公务员工会班友，究竟系咪黐咗綫？知否家下香港乜世界？」可能小弟做咗三十几年公务员，所以对呢个身分及呢三个字特别敏感，于是竖起耳仔，听佢几位有乜咁劳嘈。

哦……明晒！

原来当朝有报章内页大字标题——《两工会促额外宽免公务员薪俸税》，内容为政府纪律部队人员总工会及香港公务员总工会，齐齐去信财政司司长陈茂波，要求在下月发表的《财政预算案》中，额外宽免公务员薪俸税，以「振军心，助经济」。

班的士大哥咁馨斗，当然愈闹愈大声，难得旁边的早餐客也和应，觉得两个工会超级自私，离晒大谱。

有位肥师奶最够霸气：「真系黐晒綫！呢两年香港环境咁恶劣，做生意又好，打工仔又好，苦不堪言，又炒鱿又减薪。你班公务员，尤其高层的，薪高粮准，生活毫不受影响外，更因样样减价，令消费能力大增，喂，咁环境，仲好意思要求减薪俸税，知唔知个丑字点写？」

哗，个个咁馨，我都系戴返顶帽加口罩好啲嘞，容乜易比肥师奶喝问：「碌Sir，你同唔同意呀？听讲你都系退休公务员噃。」如此场合，当然几大唔挺身表态，反之嗱嗱声灌埋杯奶茶，找数后晨运去也。

小市民讲野最直接，心声随口而出。希望两个「贪得无厌」工会主事人，知道香港草根百姓点谂，否则下次政府民望调查，将会更「乞人憎」！

曾智华

阿碌开咪