星岛日报

【阿碌开咪】绝不妥协怎谈民主

2020-08-25 11:00
搞政治,有很多永恒皆准的道理,数百年前已传承下来,一次又一次验证。其中两项为:一、政治是妥协的艺术;二、团结就是力量(United we stand, divided we fall)。

两样都唔识,又唔接受,咁你真系唔知搞紧边科政治矣。

政治最「乞人憎」之处,为个个都认为自己一套啱晒,人哋就错晒。喂!冇咁简单呀?

你要讲民主,首先要学懂包容、理解、接受,以及一项举世准则——我未必(唔)同意你,但我会誓死捍卫你的发言权。你话特区政府及北京有意好、冇意好,总之,抛出个立法会因疫情延续最少一年决定,立时搞到泛民四分五裂(好多人笑咳)。

睇睇各个媒介,尤其网上辩论(似闹交多啲),真系好难分辨某啲人在胡乱情绪发泄,搞乱档拆民主台,定在真正诚心去推动香港民主发展。

自己以为爬咗上道德高地四围喝骂别人者,最为讨厌,亦最无资格讲民主,因为在民主光谱之内,冇人完美。若你粗声大气,肆意踩人就以为等于啱晒,效果正是刚刚相反,其实你正在搞唯我独尊。你一步都唔让,一点都唔妥协,咁若其他团体又一样,成个世界咪散晒?这又是否你从政的初心?太自私了。搞政治,必须说服大部分人接受自己的理念,咁,首先要别人感到舒服。靠闹、靠诋毁对方,一世都唔会成功的,明唔明?

策略上,泛民议员可以玩留,也可以玩「反枱」,两者皆有其道理。但最重要,仍是同路人先寻求共识,再争取香港市民的最大公约数支持,这才是民主!

形势不利时,可能要策略性让一让、忍一忍。有如跑马,一味开闸死冲的,必中途脚软入弯堕后,输硬,跑不同途程应用不同策略。泛民阵营必须坐下,开放胸怀倾掂佢,然后一二三全部同心去马。

再讲一次,任何人以为自己啱晒、别人错晒,唔该夹开食,咪话自己在推动民主!

曾智华

阿碌开咪

最新回应

關鍵字