做阿梅最後演唱會最唔開心 倫永亮心痛：佢每一次都冇晒氣

倫永亮受訪港台節目《舊日的足跡》，身邊向來不乏女性知己，如陳潔靈、林憶蓮、葉麗儀等，但倫永亮依然單身，原來這和梅艷芳（阿梅）有莫大關係。倫永亮解釋，他的初戀發生在美國夾band的時候，對象是樂隊裏的女歌手，後來倫永亮回港後一切以事業為重，直至他與阿梅常往外地登台。「佢（阿梅）識好多佛學，講咗好多發人深省嘅佛偈，佢話一段感情或者工作，都會隨住時日改變，日常生活所有嘢都會改變，係無常嘅！佢成日叫我『放低，放低』，如果嗰段感情唔啱自己就要放低，依家我睇好多佛書，發覺一個人一樣可以好開心。」
提起梅艷芳，倫永亮至今依然感到心痛，說：「2003年，阿梅最後嘅演唱會，係我一世人做咁多演唱會最唔開心嘅一個，8場每一晚都唔開心，因為我喺下邊彈琴，我聽到台上嘅歌者係一個病人嘅聲音，有時沙啞，有時唔夠氣。」倫永亮難掩傷心之情，坦言最難忘是每一晚阿梅總是拖著長長的婚紗，走上長長的梯級，然後，那道門關上。那個出口正是紅館一個角落的入口，阿梅要走過很多樓梯才可返回後台，每一次倫永亮都會在樓梯下等阿梅。他說：「我好心痛，佢每一次都係冇晒氣，筋疲力盡，我同佢講要好好休息。」到了現在，倫永亮也不明白為何病重的阿梅還要堅持開show，他喃喃自語：「可能係要留畀歌迷一份最深、最真摯嘅禮物！」他說手上那張演唱會DVD，他只看了兩首歌，事隔16年，他還是不忍心再看下去。