【維港會】MCL戲院發深情文籲做高質觀眾 提3次「千祈唔好劇透」

全球Marvel觀眾期待的《復仇者聯盟4：終局之戰》（Avengers：Endgame）今日正式上映，相信不少支持了10年的忠實影迷亦甚為感觸。MCL戲院昨晚亦在facebook專頁發文，分享10年以來的心聲，並又呼籲觀眾遵守「睇戲禮儀」。

MCL院線昨晚在其facebook專頁分享一張寫着「給觀眾的信」的照片，並以「俾你踢過無數次的戲院凳」身份發文。MCL在文中指，「大家喺度都留低過唔少腳毛。從第一套Iron Man到依家，由菲林進展到去4k，好開心可以陪住你哋一齊笑過、喊過、緊張過、感動過」。

其後，文中亦提出幾項希望觀眾能注意的事情，例如對經常遲入場的觀眾指，以免看不到片頭、入場時完美阻礙其他人視線，「不如今次試吓準時一次咁多吖？」另外，文中又指「個個都開場前10分鐘先拎，成件事就唔止係10分鐘㗎喇」，因此建議觀眾切勿在開場前10分鐘取票，應再提早一點，或嘗試以QR code入場。MCL亦呼籲，觀眾,在散場後自行帶走食物、垃圾，並指「我唔想你哋為咗我，苦了啲清潔姐姐呀，求放過」。

文章亦再表示，「其實我哋可以見證到一個持續咗十年嘅故事嚟到ENDGAME 一刻，真係唔簡單」，並指戲院是一個為大家留下回憶的地方，「希望大家可以珍惜每一個movie moment，做個高質觀眾」，並指「我都好想以後繼續同你哋一齊經歷每一個座無虛席嘅moment」。另外，在文末亦再次強調，《復仇者聯盟4》需時約3小時，提醒觀眾記得去完洗手間再入場，並提醒不應在睇戲期間討論劇情，「有咩返屋企再慢慢講」，並指「睇戲途中影相偷拍呃like撳電話就更加唔好啦」，以及「千祈唔好劇透，千祈唔好劇透，千祈唔好劇透！」

不少網民其後紛紛留言，大讚帖文「高質」、「講得好」、「邊個寫㗎，加佢人工」等。另外，亦有不少人認同文中提及的睇戲禮儀，並指「我都唔明自己嘅垃圾自己帶走有幾難」、「唔理你係傾劇情定乜都好，入到場開左場就唔該唔好講嘢，而家啲人好擅無忌憚咁講嘢當正自己屋企咁，不知所謂。係咁踢櫈呢啲不在話下」等。