男童霸位睇煙花隨地小便濺濕情侶 母反駁：唔通我哋走開咩

出街人有三急乃正常事，但不應該隨地便溺。有網民目擊一對母子在主題公園霸位睇煙花期間，男童疑隨地小便，濺濕附近坐在地上的情侶，更指「細路仔忍唔到就要痾㗎啦，又差唔多開始，唔通我哋走開咩」，引起討論。

有網民在facebook專頁「生仔要考牌系列」投稿，指早前到主題公園睇煙花，因睇煙花不設劃位，位置先到先得，指當時有一對母子早已霸了個靚位，「個仔都生得算高大，估計超過10歲，然後其他已經冇位坐嘅人就會選擇坐住地下等。」

距離放煙花還有約15分鐘時，網民指有一對情侶突然站起來，並大聲問：「點解濕嘅？」男童媽媽即表示：「細路仔忍唔到就要痾㗎啦，又差唔多開始，唔通我哋走開咩？」附近遊客都指責該名母親，但她留駁指「細路仔係咁。」並將水倒落地「宜家咪沖走晒囉。」

網民指有一名大叔看不過眼，指「細路仔本身唔係咁，係因為冇家教先係變成咁，宜家唔係沖唔沖走嘅問題，而係佢當街去廁所，仲有個覺得冇錯嘅阿媽先係問題。」然後該名母親一聲不發，「全部人即刻係未開始放煙花已經拍爛手掌…….
真係唔識教就唔好生，一代影響一代！」

不少網民都認為該名母親應該教導小朋友到廁所如廁，「係咪痴㗎，細路仔急就要同佢去廁所㗎啦，為咗個睇唔睇都得嘅煙花迫佢周圍痾，仲要有人坐嘅位」、「以前俾人話冇家教係好大件事，但而家好多新一代父母唔覺自己細路俾人話冇家教係件事」。