雨僑度蜜月堅持慳家 羅力威Sweet爆買情侶裝拍照

雨僑（Ava ) 與老公羅力威結婚後一年多，終於展開二人世界蜜月之旅。身為藝人兼Youtuber的Ava度蜜月亦不忘拍下遊日影片，與觀眾分享旅行慳錢大法。雖然旅行途中遇到不少阻礙，不過有老公陪住的Ava依然幸福滿瀉，更大讚老公影相技術大有進步，親自操刀為她影了不少靚相。

今次旅行原來是兩夫妻首次享受二人世界，雨僑表示：「旅行多數都係同家人或朋友去，之前都係出席朋友婚禮先一齊去日本，今次真係第一次兩個人去玩。」
去旅行都要堅持慳家，雨僑表示其實不難，她分享：「只要預先計劃好，好似我哋有一日去溫泉旅館，歎完五星級享受，之後幾日嘅行程咪慳番啲。」至於其他慳錢秘訣，Ava就賣關子要大家留意她即將上載的影片。

兩人的蜜月之旅固然甜蜜，但當中也發生不少趣事。兩夫妻去到霧島神宮，Ava發現有幾棵樹已經開花，於是積極地影相拍片，點知擺了個大烏龍，笑說：「有位好心姐姐提醒我其實我影緊係梅花，原來我唔係賞緊櫻，係賞梅，都算係加深咗對梅花嘅認識。」同穿著粉紅毛衣「情侶裝」的二人相當合襯，Ava表示：「老公見到有件冷衫好似我著緊個件，專登買來同我影情侶相，但其實我前一晚食完燒肉，所以件衫有陣燒烤味。」二人溫馨背後原來相當搞笑。