王祖藍為處男作喪跑125場謝票：10幾日瘦5磅都幾好

由王祖藍執導的賀歲片《你咪理，我愛你！》上映逾兩星期，票房直衝900萬。祖藍為答謝觀眾，過去約兩星期只要人在香港，便跑勻港九新界多間戲院瘋狂謝票。經過一輪「喪跑」後，最終參與了125次謝票，笑言有時因為「趕LOCATION，成日冇時間食嘢，所以我最終10零日入面瘦咗5磅，都幾好吖」。

祖藍又分享謝票之旅數之不盡的難忘回憶，「最難忘嘅係有一個FAMILY竟然拉大隊嚟睇《你咪理》，為數有成18人。第二係要多謝好多藝人朋友，佢哋雖然只係客串，但個個都好落力謝票，好似方力申、王菀之、白只、劉雅麗、梁嘉琪、陳明恩、大肚嘅岑麗香、苟姑娘、郭晉安、何遠東、蝦頭、吳業坤、王浩信等等，另外祥師兄（阮兆祥）仲包場請《一圈圈》聽眾睇，真係好多謝好多謝佢哋」。

問到祖藍為何要如此勞心勞力謝票，他笑謂：「咁話晒第一次做導演，都知自己有好多不足嘅地方，所以都好想喺戲院度問吓觀眾嘅第一身意見，希望之後盡量改善。」