叉電線燒着電話熱到就爆 陸永：多謝老婆嗅覺救返我條命

手提電話叉電時，發生爆炸釀成火警間中亦有發生，陸永今日在社交平台亦分享其經歷，他上載一條部分被燒熔的叉電線，說：「今朝，瞓瞓吓陸太話房有異味叫醒我聞，我不嬲聞唔到嘢嘅，我話冇味，再瞓，隔多陣陸太再叫埋simsim（女兒）同姐姐入嚟一齊聞，佢哋都話有怪味，但唔知乜味，我再瞓!!! 陸太並無放棄，畀佢搵到原來叉緊我電話條線已經燒緊，條線個頭直頭燒到冇晒咁滯，我部電話就熱到即將爆炸，而部電話係擺正喺我床頭正正隔離!!!!!!!」

幸好老婆及時發現，陸永也「多謝Reina嘅嗅覺救返我條命」，並搞笑地說：「也為世界挽救了一張美好的臉!!功德無量」。他最後呼籲大家叉電時，要小心注意叉電線。