誤殺患病妻獲輕判 81歲丈夫倡有「安樂死」

筲箕灣耀東邨前年6月發生倫常命案，獨力照顧病妻的8旬老翁「黃伯」黃國萬，不堪妻子長期受病痛折磨，以竹棒勒斃對方並意圖自盡，最終打消念頭自首。承認誤殺的黃伯今月初獲法官輕判入獄2年，扣除已服刑期，預料不日出獄。他今透過立法會議員張超雄傳話，直言「我覺得香港要有安樂死，咁樣社會就唔使嘥咁多資源，窮人唔使咁慘」。他又指香港的窮人無能力獲得老人服務，「螻蟻尚且偷生，但病起上嚟係無選擇」。

案發於前年6月6日，81歲的黃伯在其寓所內殺害其76歲妻子林美琴。據了解，根據懲教署規定，判刑前已被還柙18個月的黃伯，即使扣除獄中行為良好的刑期寬減，仍需多待在獄中1個月才可出獄。

一直有跟進本案的張超雄今早探望過黃伯，黃伯指自己身體安好，精神不俗，並多謝法官法外開恩，又感謝家人、市民、記者的關心。他坦言出獄後想「平靜地過日子，做返一個普通人，出返嚟之後暫時唔想見人，亦唔想再提呢件事」。

對於傳媒關注的照顧者問題，黃伯直言「香港嘅老人服務唔係無得做，但要係中上階層、有錢人先會用得起，我哋呢啲低下草根階層做唔到」。黃伯既無錢聘用工人，又無錢請人看顧病妻。他曾在案發前帶妻子到老人院，見過有長者「係識抖氣，但唔識郁，連說話都講唔到」。他心想「一個人最困難就係生不如死，我明白螻蟻尚且偷生，但病起上嚟係無選擇。」

黃伯續指：「我知道社會唔係咁接受安樂死，講出嚟實俾人鬧，張議員幫我講出嚟，佢都會俾人鬧。但只有生活有經驗、受過折磨嘅人，先會明白點解我會提出要有安樂死。」他期盼社會上「有多啲同路人，大家同心合力，社會同埋制度先會有改變，社會要多啲幫助窮人」。


全文如下:
「多謝大家嘅關心同埋問候，我都一一收到。字我唔識得多，希望張議員幫我傳話。我嘅故事已經喺法庭公開，希望呢件事告一段落，我亦都透過張議員收到唔少記者邀約訪問，不過我最想係平靜地過日子，做返一個普通人，出返嚟之後暫時唔想見人，亦唔想再提呢件事，希望記者明白，亦都唔希望記者喺我屋外附近等候，否則我都不知道出返嚟之後可以去邊度暫住。

有關照顧者嘅問題，我覺得香港要有安樂死，咁樣社會就唔使嘥咁多資源，窮人唔使咁慘，我哋唔會有錢請工人，唔會有錢去請三更看護。我曾經帶太太到老人院，見過有老人家淨係識抖氣，但唔識郁，連說話都講唔到。一個人最困難就係生不如死，我明白螻蟻尚且偷生，但病起上嚟係冇選擇。香港嘅老人服務唔係冇得做，但要係中上階層、有錢人先會用得起，我哋呢啲低下草根階層做唔到。

我知道社會唔係咁接受安樂死，講出嚟實俾人鬧，張議員幫我講出嚟，佢都會俾人鬧。但只有生活有經驗、受過折磨嘅人，先會明白點解我會提出要有安樂死。

最後，我認為社會要有多啲同路人，大家同心合力，社會同埋制度先會有改變，社會要多啲幫助窮人。」

法庭記者：黃梓生

建立時間：1620
更新時間：1850