張智霖對家燕姐動「真情」 叫靚靚自己賺錢

張智霖（Chilam）和薛家燕以宣傳大使身份，到灣仔智能身份證換領中心宣傳。獲頒感謝狀時，家燕姐自爆兒子石耀庭是第一批換領智能身份證人士，更表示可以帶同她一起換領。不過她近日好忙，皆因拍攝節目《新春開運王》。Chilam則表示要黐實家燕姐，因為之前為家燕姐的演唱會任嘉賓好有化學作用，更被廣告商睇中邀請跟家燕姐合作做代言人，笑言好心有好報。家燕姐說：「廣告商睇完覺得好親切、真實，好精彩。」在旁的Chilam即謂：「家燕姐真係帶挈我，再合作梗係好啦！我諗要送返份禮物畀佢。」

家燕姐又大讚Chilam對她真是很好，試過親自送她入院，開個唱時對方又二話不說應承任嘉賓。Chilam聞言即說：「呢個情係真，係真情。」家燕姐說跟Chilam合作好開心，對方為人好真，工作勤力又認真，希望對方紅到光芒四射，可以叨光。問到兩人可會想演情侶？家燕姐笑言要問過袁詠儀（靚靚）先，不過Chilam搞笑謂，睇新聞指家燕姐好多男友，這麽多對手不容易。他說：「真係嚟真？親情？時常有親情，由心感動。」談到太太袁詠儀身形清減不少，Chilam表示太太現正拍攝真人騷及一部電影，他則減產工作，現在跟家燕姐一齊，賺錢交由太太。

問到可覺太太身形夠fit？Chilam說：「可以有進步空間，可以再fit啲！（你有壓力？）難度覺得我唔夠fit？不過開演唱會時有6嚿腹肌，都覺得自己過瘦，但純天然無添加。」談到農曆年，他表示現在要跟家燕姐提早拜年，因為一家人將到日本首次滑雪。