小龍包中招流感超心痛 陳慧琳爆兩兄弟驚到問：係咪會死

陳慧琳（Kelly）出席商場迎春活動，又模仿劉德華在演唱會上打鼓，笑言體會到華仔唔易做。提到兩個兒子劉昇（蝦餃仔）和劉琛（小龍包）時，Kelly就心痛透露小龍包患上甲型流感，說：「真係好驚，細仔在學校受感染，一發病已高燒達40多度，很辛苦的不停扯衫話好熱，幸好第一天吃了特敏福已開始退燒，不用入院，但要在家隔離像坐監似的，每日只能臥床瞓覺，還要關著門，不准哥哥（大仔）入房，搞到哥哥問『細佬係咪會死？』，最慘係連細仔都問『自己係咪就死？』，加上做流感測試時要用較長的棉花棒塞入鼻中，辛苦得不斷掙扎狂喊，要動用3個大人按著他，真係心都痛，並且連照顧她的姐姐（傭人）受感染，要服用特敏福！不過今日完成5天的藥物治療後，明天細仔終於可以放監，並且已回復精神，但待過完年後再返學。」
Kelly在台上表示今年會入紙申請明年的紅館個檔期，慶祝2020年是入行25周年，笑言很驚這麼快就過了25年，並為此今年不會分心拍電影。她笑道：「最好可以有暑假檔期，兩個仔放假可以捧場，不過唔係話咁易，最重要是紅館批，甚麼檔期都可以。（會否效法張學友每3場休1日？）學友開多場呀！如果好似學友咁就發達了，但我不用咁多場，太辛苦，主要是慶祝一吓入行25周年，如果像上次一樣開11、12場已經好開心，當然如果中間可以休息一日就更開心；現在已開始為演唱會搵靈感新搞作。」有指她25年來外貌身形如一，曾於演唱會大跳肚皮舞的她會再度晒身材？Kelly笑稱：「我得嗰個位可以露，無地方了，而且會嚇到兩個仔問『阿媽，你做乜啊？』」談到劉德華申請紅館補場失敗，Kelly建議對方可於其他場地舉行，如亞博和中環海濱等，相信粉絲都會好開心。
另外，對於香港演藝人協會會長古天樂有意辦一個有認受性的樂壇頒獎禮，Kelly表示會支持和尊重古仔，但相信會有難度，因涉及太多唱片公司，唱片公司各有自己的一套。（攝影：羅安強）