冰天雪地拍MV 蔡一傑貪靚著春裝：對手凍僵

蔡一傑推出第一首日文歌《One》，早前拉隊飛赴日本秋田拍MV，他特別挑選在冰天雪地靚景拍攝，因為新歌寓意世界是美好的，冰雪也被他溶化。愛美的傑仔竟以單薄春裝Look上陣，在雪地上狂奔又瞓身。

眾人到達秋田即遇上大風雪，不過傑仔從未擔心過受影響，因為他很有信心順利完成。不過傑仔也笑說：「今次去秋田係貪佢夠白雪茫茫，又夠凍，又夠凄美，不過真係好凍。」他自言平日在陸地上跑得多，但是在雪地奔跑很艱難，「好似人生咁，幾難行的路都要行落去，仲要笑住咁行。」

在冰天雪地下傑仔只穿一件薄T恤、一件背心及春裝外套，他笑言要用身體戰勝大自然，不過卻苦了一對手，因為手接觸了冰凍空氣在1、2秒便會凍僵，他形容是痛多過凍。同行的經理人林珊珊則身穿超保暖雪褸，說：「傑仔真係唔怕凍，佢冇打底又冇暖包，佢以為自己喺夏天。」此外，在拍攝期間巧遇幾位來自台灣的粉絲，難得有緣相見當然要影相留念。

傑仔希望每首新歌MV能到不同地方拍攝，希望下次到法國南部拍攝，又表示有計劃過拍旅遊節目，想去澳洲的大自然景點拍攝，除了靚風景也對美食有心得，他自認為食，對烹飪亦有研究，寓工作於娛樂最開心。