【吳君麗離世】蓋鳴暉讚前輩和藹：一啲架子都冇

粵劇名伶吳君麗昨日離世，享年84歲。面對前輩的離去，蓋鳴暉感傷兼稱讚麗姐和藹可親，深得晚輩歡心。
蓋鳴暉回覆本報時表示：「覺得好突然，2008年一齊拍處境劇《畢打自己人》，我同麗姐冇對手戲，喺戲班嚟講麗姐係我哋好好嘅前輩，同佢傾偈佢好得意嘅，好輕鬆好和藹，好鍾意同年青一輩傾偈，佢話一齊玩覺得自己後生啲。我記得佢10年前左右，拍電視劇之前佢去跳舞Keep Fit，呢個前輩真係幾可愛，一啲架子都冇，麗姐好得意好鍾意講笑，所以我哋後生晚輩好鍾意同佢傾偈。佢離開當然係好唔開心，都希望麗姐一路好走，人生點都有呢個階段，希望佢安息。」