維港會: iPhone炒唔起轉炒膠紙？每卷賣80蚊

新iPhone今日下午接受預訂，但似乎唔係好炒得起。不過香港人出名腦筋轉得快，總會搵到搵快錢方法。隨著超級颱風「山竹」逼近，不少市民都要搶購膠紙封玻璃窗，於是膠紙價位愈升愈有，網上更傳有鋪頭疑將膠紙炒到54蚊！
填詞人梁栢堅今日出po，指今早有朋友在灣仔買3M皺紋膠紙，10蚊已買到，但中午過後，已有鋪頭賣29蚊；有網民就報料，中環已賣到30蚊。
不過，個風未打到嚟，平時最叻捉緊每個賺錢機會嘅香港，又點會咁快俾佢炒完呢？facebook專頁「成家買樓理財創富」就分享照片，一家鋪頭的膠紙今早原本賣15蚊，但其後疑一度炒至54蚊。另外，又有網民出帖，聲稱膠紙斷市，以80蚊兜售。「山竹」來勢洶洶，搵到膠紙唔通唔搶咩？