導演涉詐騙走佬演員努力宣傳 張繼聰爆Kay睇首映喊濕紙巾

張繼聰、衛詩雅、談善言等為電影《告別之前》謝票，阿聰表示影片口碑不俗，他們會努力宣傳及謝票，希望可爭取更多院線及場次。他說：「我哋盡咗演員嘅責任，太太（謝安琪，Kay）都有睇首映，都睇到喊濕晒紙巾。朋友之間係用喊濕一樣嘢嚟做量器，暫時最勁係喊到成張披肩濕晒。」衛詩雅亦謂首映當日半個家族到場支持，媽媽更大爆爸爸都睇到喊。談善言得到媽媽於家人訊息群組中發言支持，為此非常感動。

至於該片編劇兼導演劉孝偉涉詐騙走佬，致未能到場可感遺憾？阿聰笑說：「我諗我哋唔係最遺憾嗰啲，有朋友會更加遺憾。演員就做返演員嘅責任，大家不如多啲關心啲喺度嘅人啦。」問到他們是否收足片酬？他們均表示已收足。阿聰說：「認真講，事件已經牽涉到警方，我哋唔可以講太多。但係今次呢套戲大家都好畀心機，台前幕後嘅功勞係唔可以扼殺，希望多啲人支持去睇。」（攝影：李樹勳）