見證會變棟篤笑 森美自爆童年瘀事

44歲的森美在第2輯旅遊節目《森美旅行團》浸浴、反串扮藝伎的爆笑演出，成為網上熱話。熒幕上森美惹笑搞鬼，現實中他是虔誠的基督教徒，不時參演福音電影外，又會擔任教會舉行的佈道會嘉賓，分享見證。早前，他應九龍城潮語浸信會邀請，作主講嘉賓。當日他上台30分鐘，全程以棟篤笑形式來講述個人的信仰經歷，充滿娛樂性，更自爆童年時一件超級瘀事。

森美分享：「你哋平時好少見到我真人，見到真人好難得㗎，覺得我真人靚仔過上鏡嘅，畀啲掌聲我聽吓。（現場即時掌聲如雷）。不過，作為一個上鏡嘅人，聽到呢啲掌聲唔係好開心。之但係，有次搭的士，司機用倒後鏡望住我講：『森美，你真人冇咁樣衰。』你話好嬲定好笑？」

森美又自爆從小已喜歡說話，又愛交朋結友，然而讀至中三，他由赤柱聖士提反書院轉到九龍塘喇沙書院就讀後，初時因仍未能融入同學圈子，曾有過一段孤獨的學生生活。他憶述：「轉到九龍塘讀書，因為近屋企。以前我有好多嘢講、好多朋友，但一轉到去，就冇晒朋友！因為新學校嘅同學，好多都係由小學開始同班，已經好friend，所以去到中三，已經冇可能同人friend。」尤其入學初時的個多月，最令他難受的是放午飯時間。「嗰個幾月，我係一個人食飯，我開始怨一樣嘢，怨乜嘢呢？我怨個lunch time太長！」森美七情上面地說。「個半鐘頭！食一餐飯，兩個字（十分鐘）就食完，仲有一個鐘頭四個字（一小時二十分鐘），我坐喺度唔知做乜嘢好，好唔開心。」

就在這段孤獨的日子裏，卻有一名同學每日不停向他噓寒問暖。「佢好奇怪嘅，每朝早一返到學校見到我，就會走埋嚟：『Sammy，你今日點呀？』『OK呀、OK呀！』第二日，佢見到我又會問：『Sammy點呀？你今日OK嘛？』搞乜呢？點解呢個同學日日都要問候我一次？」後來他從其他同學口中，才得悉這位同學的背景。「佢哋話：『佢以前好曳㗎！講粗口，又試過擸架生打交！佢係今年先變成咁咋。』搞乜變成咁呢？原來返咗教會。」他很好奇，為甚麼這個同學會有如此大的變化，於是便嘗試跟他返教會。「唔去尤自可，一去，即刻變成好多人一齊嚟問候我！好尷尬！」

查實森美的基督教信仰，自小已受母親薰陶。「我媽咪想我讀教會學校，所以我讀幼稚園冇耐，我阿媽就帶我去教會聽故事。每晚臨瞓前，我都會有祈禱嘅習慣：『主呀！今晚唔好瀨尿！』好得意，我嗰晚冇祈禱呢，就瀨硬。」森美的見證輕鬆搞笑，難怪當日佈道會座無虛席。