森美帶丁子朗浸「電氣風呂」 爆笑硬晒軚震親Pat Pat

無綫旅遊節目《森美旅行團》第2季有森美帶麥美恩、丁子朗及吳若希玩轉日本京都，昨晚播出的集數見森美與丁子朗齊齊去公共澡堂浸「電氣風呂」，兩位壯男玉帛相見，肌肉相當養眼。未浸風呂前，森美介紹：「可以醫神經痛、腰痛、腸胃唔好、疲勞嘅回復。」

兩位疑光脫脫落水，下身重要部位打格。浸水一刻即面容扭曲，電到「硬晒軚」、肌肉抽搐，森美爆笑話：「嘩！唔掂喎，手腳肌肉自動跳動，最慘係隨意肌同不隨意肌都郁緊！」丁子朗仲描述：「屎忽嗰忽肉係咁震。」畫面爆趣令網民留言讚：「笑死，要追睇」、「求無格版」。亦有人表示：「我喺日本都試過浸電氣風呂，邊有佢哋電得咁誇張」。

另外，今晚一集眾人會變妝成舞伎、武士等大鬧街頭，捕獲當地市民及遊客影相。阮小儀在電台節目《早霸王》都開咪讚森美扮舞伎算樣靚，不過身形太壯十足「雪櫃」。