維港會: 介紹氣象科普知識 天文台靚抽FB「inbox」文化

近期不少Facebook專頁為咗與網民加強互動，增加專頁嘅「engagement」，都會要求網民留言，然後「inbox」回應。不過，天文台Facebook專頁昨日就「靚抽」呢個新現象，係介紹新一則《天氣隨筆》時，講明「我唔用inbox答你,我直接答你」，獲唔少網民欣賞，成功「呃Like」。
話說天文台呢個Po，係向讀者介紹最新嘅《天氣隨筆》，講解熱帶氣旋「雲雀」反其道而行，先去日本本州，再西行到九州出海兜圈，之後再橫過東海吹襲上海一帶嘅反傳統路徑，以及與近期日本熱爆錶有無關係等。不過網民最「Like」嘅，係天文台小編借機「抽水」，諷刺近期唔少Facebook專頁要網民留言，再「inbox」解答嘅文化，除咗講明唔使inbox，「In你個頭」，仲俾埋條link你直接睇答案，hashtag埋「#Yo長知識啫唔使咁麻煩啦」。唔少網民留言大讚「靚抽」、「好波」，似乎網民對呢種「inbox」文化都幾厭惡咁喎。