為新碟封套換8個Look 楊千嬅勁滿足：似影春夏時裝目錄

楊千嬅推出新曲加精選碟《ONE ON ONE》，為拍攝封面相她著住6吋高跟鞋做出仿如瑜伽般的高難度動作，要拗腰、瞓地、俯身彎腰、單腳企、sit-up和抬腿等，花了近10個鐘，換了8個造型，影過千張靚相。

由於影唱片封面是整張唱片製作過程的最後步驟，所以每次影唱片封面都令千嬅特別興奮，她說：「過往精選碟通常簡簡單單用一張大頭相做封面，今次專登花好長時間換好多套衫，影一輯全新靚相。每次影唱片封面都好開心、好大滿足感，證明我哋又完成一項重大任務。不過今次真係影咗好多相，我成世人未試過影一個唱片封面影咁多相和咁多套衫，好似影咗一本春夏時裝目錄！」

今次新碟帶給千嬅很多新體驗，其中新歌《搖滾之母》是千嬅首次唱Rock，她坦言最初有點擔心：「我嘅歌未試過節奏咁勁，呢個範疇（指Rock Music）以往唔敢隨便觸碰，容易惹起爭議。但自從演唱會同Carl合作好有火花、好多交流，加上反正人生在倒數，乜都要試。」

至於「精選歌」部份，千嬅亦以新方式選歌單，「我好感激每位喺楊千嬅音樂路上遇到嘅老師、知音，所以請佢哋揀歌，成為精選部份。我曾經諗過佢哋會唔會揀啲好冷門嘅歌？甚至連我都遺忘咗嘅歌？其實咁又有乜所謂，可能更有新鮮感，唔一定人人都識嘅歌先至可以放入精選碟。」被邀請的包括DJ好友、造型師、唱片界幕後功臣、歌手、前助手和歌迷等，並寫下與千嬅的小故事。其中老公丁子高化身「歌迷」選了《煉金術》，他留言放閃：「因為呢首歌係我第一次真正認識佢嘅時候係佢面前唱畀佢聽嘅歌。 」