非為生B離巢 岑麗香轉投王祖藍旗下

岑麗香自月前宣佈約滿無綫後，今日首次出席公開活動，親自解釋離巢原因，並透露已跟王祖藍旗下經理人公司簽約。自加拿大返港的香香，自言過去一個月過得非常充實，先跟丈夫強強出席兩個親友婚禮，再陪伴至愛的婆婆。香香說：「陪婆婆係最開心嘅事！仲揸車遊半個加拿大，都要幾日㗎，之後去法國拍廣告。（強強陪你去？）無啊！做嘢就自己去，都好吖，買嘢無人喺隔離睇住。」
談到新方向，香香透露7月份剛簽約王祖藍公司旗下藝人。問到酬勞？她笑說：「唔講得㗎！佢哋唔畀講㗎！（簽幾耐？）呢啲到時先再講，都夠嘅。」至於未來工作方向，會拍劇還是內地綜藝節目？她說：「都鍾意拍劇嘅；同時都想試吓唔同嘅嘢，返大陸要做好多功課，學咗7年廣東話，學少少普通話都唔怕嘅。」現在是否自由得多？香香說：「自己想多啲時間陪屋企人。」

對於被指離巢為全力造人趕生B？香香說：「唔係，生BB方面會努力。」好姊妹李亞男變身老闆娘，可有催她生B？她說：「反而無，唔好咁大壓力，順其自然最好，最近都收到好多貼士。」她亦為祖藍跟亞男將當爸媽感到非常開心，但她不知也有待他們親自公佈BB性別。問到希望BB像爸爸還是媽媽？她笑說：「女仔似亞男多啲！（男呢？）兩個都係好朋友，你唔好迫我啦！」（攝影：張家宜）