車主向抄牌警員拍片 霸氣阿SIR:記得擺上網呀！

警員和駕駛者不時因抄牌有拗橇。網上流傳片段，有車主疑不滿食牛肉乾，拍下警員抄牌的片段，但片中警員無懼鏡頭，直斥車主違法在先兼「聲大夾惡」，更霸氣要求車主「記得擺上網」。不少網民睇片後均批評車主無理，讚揚警員處理事件公平又淡定。

有關片段由網民「大鱷」上載到facebook群組「馬路的事討論區」，一名警員面對鏡頭說：「鍾意周圍泊新填地街吖嘛？違法位當自己合法呀？係咪要問過你先可以抄牌呀？吓？差人做嘢係咪要問過你先可以抄牌呀？」對於車主舉機拍攝，意欲公審的行為，警員反斥他「擺違法位聲大夾惡」，更提醒他「要記得擺上網呀」。

網民對警員「霸氣」回應大加讚揚，表示警員做事冷靜，更指「依家香港，其實......好多人都唔識分錯對。 總知......如果道理唔夠人講，就攞手機出嚟拍片。佢哋往往以為自己就喺正義超人。」但同時有網民希望看到更詳盡的片段，才可判定誰是誰非。