港媽攜兒趕回校考試 紅的司機上車鬧到落車：有綠的你唔坐

坐的士真係隨時要受氣！一名港媽在facebook群組發文，指日前早上與兒子趕住回馬鞍山區内學校考試，眼見遲遲無新界的士，於是匆匆登上一輛市區的士，結果由上車被鬧到落車。

港媽在facebook 群組「馬鞍山之友」發文指，與孩子登上一輛紅色市區的士。雖然一上車就有表明「司機唔好意思，等左好耐無綠的士，小朋友就夠鐘考試」，未料的士司機隨即反駁「有綠的你唔坐」。港媽試圖解釋「我話落雨，等好耐無綠的」，的士司機居然質疑「我又見你唔到，點知你係咪等咁耐」。

港媽繼續解釋「你都見我係綠的到行過嚟啦，小朋友考試唔可以遲！唔該你啦」，司機責怪「明知考試你唔早出門口，唔早起身」。港媽又再反駁，「你點知我無早出門口？」。車程到一半時，司機更停車指向其他的士，「你睇，有的士啦！香港政府咁好，設有Uber，綠的又平，你都唔坐，仲要駁我嘴，你依家想點？」

港媽終於忍無可忍，反擊「有綠的我使求，你依家我問你想點？」，港媽稱「我日日都坐的士，我問過呢個位係紅的/綠的都可以嘅。我小朋友考試，你唔好嚇親佢，請問你係咪無屋企人嘅？我一上車都話唔好意思，又唔該你，車你又開左一半，仲問我想點？」。

不少網民支持港媽，聲討的士司機欺人太甚，「長又話遠唔識路，近又話賺得少唔載，最好唔駛做就有錢袋喇好無」、「就算唔跳表啊，都有權搭的士囉」。