幫襯女僕餐廳被扯乾 張敬軒大嗌好攰

張敬軒正為6月紅館個唱積極籌備，早前他跟電台DJ細So去了日本做直播節目，還忙裏偷閒到「女僕餐廳」朝聖。一入到餐廳，女僕們即大嗌：「我哋嘅主人番嚟啦！」軒仔戰戰兢兢行入去坐低，被問到名字，細So老實作答，隨即又不想用真名，軒仔於是靈機一觸話細So叫「農夫，FAMA」，自己就叫「C君」。
叫完飲料送上後，他們要先跟住兩位女僕唸一堆說話，足足講了20秒，說是令飲品變得好味的「咒語」；再來食物，軒仔即笑謂：「畀我抖吓得唔得，very tired。」不過女僕聽錯，以為軒仔肚餓：「very hungry?」老規矩，食之前又要為食物添加「愛情」，今次除了講，仲要跟住女僕做很「kawaii」的動作，又做了10秒。做完後，以為有得食，餐廳卻突然熄燈，音樂響起，一眾女僕拎住咪出來又唱又跳，但食物還未落肚。
表演完畢，突然有人叫軒仔，原來余安安都來這間女僕餐廳，軒仔搞笑說：「我哋即刻要變男僕呀！ 」安安姐很配合說：「服侍我啦！」最後，女僕請「C君主人」和「FAMA主人」跟他們合照，二人頭上戴住對貓耳仔好可愛。離開女僕餐廳，軒仔即鬆口氣，說：「真係好攰，食餐飯好似飲咗4餐茶咁樣。」