為紅館騷性感無底線 李幸倪：Deep V碎料啦

李幸倪（Gin Lee）為新車發佈會擔任嘉賓，她表示仍未打算買車，因為香港道路較窄，駕車時壓力太大，待駕駛技術提升後再考慮。問到可喜歡開快車？她笑說：「唔會，我好細膽。記得讀書時期，好似趕去考試，坐一個男同學車，佢一般公路開到140。好後悔上車，覺得自己生命有危險。（你同學還健在？）唔知，唔熟，唔想再見到佢。」

另外，談到6月紅館個唱準備情況，Gin Lee透露因喉嚨發炎已休息了好幾天，情況已好轉，相信過兩天可再開始排練及健身。她提到紅館個唱性感無底線並笑說：「我同服裝師講咗無底線，最緊要靚同配合。（會有Deep V？）Deep V碎料啦！（咁咩係勁料？）我都唔知，因為無底線。」