【睇戲食嘢引風波】被鬧冇禮貌兼自大 袁偉豪發文平反

有人鍾意入戲院睇戲食爆谷、薯片，亦有人想靜靜地專心欣賞電影，喜愛邊睇邊食的朋友盡量減低聲量，不騷擾別人就可以。話說超級英雄巨製《復仇者聯盟3：無限之戰》昨日上映，晚上有特別場只邀請圈中人出席，袁偉豪是其中一位，可是因其他觀眾進食引起了小風波。

某位行內人士睇完《復仇者聯盟3》後，在社交平台稱遇到「自以爲天王巨星嘅TVB男artist」令他不愉快，「從好多TVB前輩口中都聽過呢位上位中嘅小生態度非常差，今日親歷其境」，他指該名男藝人以為被他朋友望，繼而用不友善眼神睥人。食薯片時，他聲稱男藝人用極差的語氣說：「你細聲啲！」因此那位行內人嬲爆謂：「我好肯定我係冇製造任何不必要嘅聲量，丫巨星不如你表演如何食薯片完全冇聲？你咁驚聽到任何電影以外聲音，你點解唔自己包個戲院睇啦嘛，咁咪冇聲咯。」、「你要覺得自己有幾紅先會用咁冇禮貌嘅語氣同人講嘢？真係火都嚟。」

當網民估誰是「自以爲天王巨星嘅TVB男artist」時，袁偉豪已在社交平台發長文承認是當事人，致歉及講出事件的另一版本。他留言：「這幾位行內人所說的人就是我，本來可以靜心去欣賞一場好戲，但後來變成如此收場要讓幾位同行留下不好印象，要讓大家有個不愉快的晚上，首先我表示歉意！」他澄清沒有用不友善的眼神望對方，「我只有對著當時正在進食nachos時，把包裝發出聲響的那位朋友在他耳邊輕聲説聲：『唔好意思，可否細聲一點？』這位朋友就回應我一下並且表現得很合作。」

直至電影播畢，袁偉豪說食nachos的朋友亦即是發文鬧他的行內人連聲道：「咁X巴閉包場睇戲呀！未聽過人講話睇戲不准進食！甚麼大明星！咁X巴閉，點解要攞免費飛睇呀？」袁偉豪直認當刻嬲嬲地，「但我只有回頭跟這幾位行內人正面説：剛才真係唔好意思，我已經好有禮貌而且在你耳邊細聲說吧！（沒有讓大家失儀的意思）對方説：得！我一定（將事件）擺上網，總之坐咗喺你隔離嘅就唔係二打六！我跟他點頭之後我便跟我幾位圈中朋友離場！」他重申沒有不准別人進食，只是想對方為他人設想，進食時細聲一點，「無論你是『行內行外人又或者是甚麼人也好』只是希望大家可以説一點道理和給大家一些基本專（尊）重」。擔正劇集《棟仁的時光》的袁偉豪在劇中要錫人偷取時間延續自己生命，他最後搞笑道：「#假如我是棟仁 #一定會給你一吻」。