孖蘇康澳門開騷歌酬除2 梁漢文：冇嗰兩隻嘢幾爽喎

梁漢文（Edmond）於蘇永康前晚在澳門合體開騷，二人決定起雙飛，歌酬由二人袋袋平安，在演唱會上他們施展渾身解數，幾度落台握手兼與大玩selfie，令觀眾蜂擁到台前炒熱氣氛！
Edmond和康仔不時與觀眾大搞互動，實行零距離接觸，握手位不絕，因為他們幾度走落台及到兩側觀眾席握手又selfie任影唔嬲，令粉絲們衝上前爭位自拍，Edmond更不惜企高在圍欄上邊唱邊與觀眾打招呼，保安人員見狀即上前攬實他雙腳，他笑言未試過屁股坐在別人的膊頭上！
二人在台上除了合唱有大部份時間是個人獨唱，Edmond笑說：「今晚幾爽喎，冇咗嗰兩隻嘢（許志安、張衛健），平時有Big 4係就係好熱鬧，不過歌酬要除4，但係今次除2喎！好開心喎！」康仔與觀眾互動時，即興將自己隻戒指送給一對長者夫婦，並著老伯伯為太太戴上，接著康仔開心大叫「禮成！」；他又邀請粉絲上台合唱，卻原來他點中專程來捧場的歌手陳逸璇，故搞笑說：「好少見啲粉絲咁靚女，唔理佢唱得好唔好聽，最緊要好睇咗先。」結果二人合唱一曲《從不喜歡孤單一個》。尾聲時Edmond和康仔以譚詠麟的經典勁歌串燒作結束！
對於今次他們二人組合舉行演唱會，Edmond笑說：「今次在這個場地演出有些感觸，因為以前有Big 4及男人幫組合一齊演出，但是現在只有我和康仔難免有點唏噓，不過當想起歌酬是除2，就當堂醒晒，好正！」康仔亦贊成以後二人要多多合作。至於Big 4及男人幫個兩組合何時再復合？康仔表示一切隨緣！
康仔的太太及兒子也有到來，不過可愛的囝囝卻冇面畀，聽聽下歌睡魔急call。康仔笑說：「囝囝去年有跟去新加坡演唱會，可能佢當時好細個，所以太嘈唔可以出台前聽，今次佢有出過台邊一陣，希望下次再唱佢可以坐台下睇爸爸唱歌，其實囝囝好鍾意聽啲節拍強勁嘅歌，Edmond喺台前唱歌時囝囝仲郁來郁去，點知我換完衫出場個仔就瞓咗，所以尾part唱譚詠麟嘅串燒快歌，想叫醒個仔起身！」