肥媽嬲到報警叫人舉報！俾人冒認開fb賣嘢

肥媽（Maria Cordero）一向係女廚神，形象入屋整嘢又好食，自然係生招牌，人人都想搵佢做代言。不過有不法之徒，竟然亂用佢嘅相同fb，開咗個社交媒體專頁，係咁話係佢推介嘅嘢，相信有唔少人信以為真，肥媽係性情中人，更加心痛有支持者俾人呃，經已立即同facebook舉報同報警，而且係網上發帖，叫大家一齊舉報！
肥媽點埋名貼晒圖出嚟，原來嗰個涉嫌假冒嘅專頁叫「肥媽私房菜」，又用晒肥媽嘅相做頭像做宣傳，經已有5000幾人like咗，更加不時用肥媽嘅名義搞團購推銷產品，講到似層層咁，但原來係未問過肥媽，難怪肥媽㷫烚烚啦！
肥媽發晒封殺令，係真嘅帳戶話「近日在社交網站Facebook發現肥媽私房菜的專頁，頁面更直接盜用了本人的照片及肥媽名字作無關的宣傳。
於Facebook 網上平台售賣物品，特此聲明所有售賣的物品與本人無關。本人保留循法律途徑追究任何侵犯肖像及商標的權利，特此發表《嚴正聲明》，以正視聽。
本人對Facebook亦保留循法律途徑追究權利。
請大家不要受騙！！」
肥媽仲留言話「你哋唔好俾人呃！唔抵呀嘛」，叫大家見到這個「肥媽私房菜」專頁的話，請幫忙向Facebook檢舉。