孖靚靚阿佘同台硬晒軚 張智霖：唔通軟晒咩？

吳鎮宇、古天樂、張智霖（Chilam）與太太袁詠儀（靚靚）、佘詩曼、張達明等出席電影《洩密者》和《家和萬事驚》的發佈會，眾人在台上影大合照時，曾與Chilam傳緋聞的佘詩曼，跟靚靚在台上狹路相逢，二人未有眼神交流，夾在中間的Chilam明顯站姿僵硬，祝酒後阿佘則主動和靚靚碰杯，對方亦回以微笑。
事後問到阿佘是否因傳過緋聞而覺得尷尬？阿佘否認，並指是傳聞而已；Chilam就指是有人別有用心，他們曾在一些派對上同場，亦有互相打招呼。問Chilam是否因站在老婆身旁而硬晒？他笑說：「唔通軟晒咩？似軟皮蛇咩？其實我剛才都企錯位，因為台上有貼名，我看到張就以為是自己。」阿佘即笑他有老花。
靚靚則認為老公站在她旁邊硬晒很正常，說：「有乜咁出奇，唔係企在我隔離硬，企邊個隔離硬？（他旁邊有阿佘？）都熟。（有幾熟？）又不是太熟，但有在公開場合見過，去探班時都會見到，有打招呼，這是禮儀。（覺得尷尬？）點解要尷尬，我和好多人都傳緋聞，他又有唔少緋聞，咁我咪好唔得閒，我是大人，唔會咁小朋友，無話尷不尷尬。（對方覺得尷尬？）不要再講這個話題了，偏離晒。」（攝影：鄧國良）