自封「沙田麥偉利」 張敬軒Call埋麥包派碟冧粉絲

張敬軒去年曾承諾過粉絲出新碟、拍電視劇等，不過全都走數，結果今年就被粉絲清算，在網上貼了一張走數清單。軒仔早前開始「找數」，一次過出廣東碟和國語碟，其實所謂的出碟，是在瓷碟上寫字，日前更相約粉絲在麥花臣球場交收「張敬軒親筆提字彩繪大碟」。

與南非騎師麥偉利有幾分相似的軒仔，搞笑著上騎師衫、騎著玩具馬仔出場，Call埋另一位「麥生」麥長青齊齊派碟。軒仔的出現令粉絲非常驚喜，最後大家開心大合照，「找數」成功。Hashtag達人軒仔完成任務，並留言：「#我 #沙田麥偉利帶住愛駒 #打你牙 落#旺角麥花臣馬場 同 #麥包哥哥一齊派禮物畀我啲Fan 畀佢哋一嚐拉頭馬嘅滋味」。