狂呻湊B辛酸 孫慧雪後悔囝囝先學識叫媽媽

孫慧雪去年7月誕下囝囝Riley，今年初嚐帶仔拜年的滋味，她昨晚現身主演的電視劇首播飯局，表示原本也想帶埋囝囝出席，先問準老公以免老公擔心，不過老公怕醜不肯同行，自己又搞唔掂，即呻新手媽媽的苦況：「我今年第一次帶BB拜年，亦多謝咁多人畀利是BB；但原來帶BB出街真係好有難度，每朝起身要整好晒BB全日的食物，整完已經腰骨痛，即刻諗起以前過年可以瞓到好晏，現在無可能了。以前仲會嬲啲人搵小朋友做藉口，但現在完全體會，亦唔希望將來會被人怪責。」

笑問還有甚麼湊B血汗史分享？阿雪即說：「有呀！我本來好期待BB叫媽媽先，當BB學識了叫媽媽就不停咁叫，就算老公幫BB換尿片、餵食飯，甚至我化妝，BB都會不停叫媽媽，搞到我不停咁走來走去話媽媽嚮度，難怪別人說BB叫邊個先就邊個辛苦。雖然以前真係好想叫我先，但現在好後悔，事關好攰。（會否做全職媽媽？）我會繼續工作，仲要努力工作，為BB做個好榜樣。」