【望網絡暴力減少】曾志偉已起訴韓姨 痛心明星足球隊舊聞被翻炒

曾志偉今午為近來的性侵疑雲開記招，不設問答環節，分別以廣東話及普通話發表內容，整個記招歷時10分鐘左右。

曾志偉表情沉重回應近日的傳言，「各位新聞界嘅朋友大家好，辛苦大家。最近喺網絡上面出現咗一啲不實嘅報道，呢啲針對我嘅報道係非常嚴重嘅指控，已經影響咗我個人嘅聲譽，更加令我難過，係連身邊支持我嘅朋友，我摯愛嘅家人、仔女，甚至乎明星足球隊，都遭受到不必要嘅傷害。我覺得我有必要行出嚟，作出最後一次公開嘅回應。」

針對「曾志偉性侵藍潔瑛」的傳聞，曾志偉表示「我可以同大家講，係完全捏造，尊重女性係我堅持嘅原則，我願意配合任何形式嘅調查，我亦都堅決用法律嘅手段維護我嘅聲譽。」

另外，再有一名自稱「模特兒教母」的內地女士韓穎華，在社交平台連番直指曾志偉捲入性侵，曾志偉回應：「對於韓女士的不實指控，我已經採取咗法律行動去起訴佢，目前已經走緊法律程序。」他稱有指控關於明星足球隊：「話我哋足球隊借慈善賽為名，尋歡為實，其實呢個報道喺2006年，當時我哋已經控告對方誹謗而作出勝訴，但咁多年後竟然再有有心人攞出嚟抹黑，我非常之難過、唔開心。」

已採取法律行動的曾志偉坦言：「希望法律可以畀我一個最終嘅結果，還我一個公道，但我更加希望通過網絡發佈，傳播不實報道、惡意中傷他人嘅壞風氣可以早日停止。網絡當然帶畀我哋好多便利，但係亦俾立心不良嘅壞份子，更容易利用網民嘅不知情去混水摸魚，操縱大眾情緒去傷害他人，事後佢哋又唔使付出任何代價，呢個係最悲哀。」

曾志偉續說今次開記招的原因是想網絡暴力得以抑止，「以往我對於失實報道，都係不聞不問、不瞅不睬嘅態度，因為清者自清，使乜回答佢，點解要畀對方炒作嘅機會去達到目的呢？但係喺今時今日嘅網絡世界，似乎已經行唔通。今次呢件事令我深深明白，如果對造謠或者傳謠者一味忍讓，又唔令佢哋付出代價，只會令網絡暴力愈來愈嚴重，真相愈來愈難見天日，謠言同網絡暴力係一時，但係對相關人造成嘅傷害係一世。」他希望同類事件及被害者可減少，今次的性侵疑雲事件已進入司法程序，日後不會再回應相關事件。

坐在曾志偉身旁的林嘉仁大律師在記招結束前補充幾句：「根據香港法律，轉載誹謗性嘅訊息都屬於誹謗，都有可能有民事法律責任，希望所有人都刪除同停止發佈，同埋停止轉載任何誹謗曾志偉先生嘅文字或者訊息，多謝大家。」