黃淑儀想返加拿大拍《吾淑吾食》

黃淑儀、張立基出席韓國電影《與神同行》首映禮，張立基表示懂得煮家庭小菜，試過上網睇黃淑儀教煮檸檬雞翼的片段，他亦照辦煮碗成功炮製雞翼。他又稱聖誕節期間夥拍張衛健、吳國敬及鄭敬基到三藩市登台，農曆年可能公佈新工作。

黃淑儀表示今年農曆年未能返加拿大度歲，因為有份演出的新劇《好日子》到3月才完成拍攝，老公早排來港兩次要到復活節才會再來港。問到可會再開拍《吾淑吾食》？她表示好多人睇過《吾淑吾食：澳洲篇》後，覺得在香港拍已經不收貨，所以下次要再去外國拍攝。她謂：「如果想去梗係加拿大，自己屋企喺嗰邊，我有朋友喺當地開溫室種植黃椒、紅椒，仲有一蚊咁大嘅藍莓，有機會介紹就好。」