游說父母將拾獲iPhone物歸原主 學生痛心雙親嫌200元報酬少

路不拾遺是良好品德，但有學生分享其任職的士司機的父親拾獲一部iPhone後，母親想據為己有，幸該學生極力游說下，家人終同意將手機物歸原主。失主取回手機後，亦將身上僅有的200元給予學生作報酬，惟學生家長嫌少，「攞去鴨寮街賣都賺得多啲錢」。學生反駁認為對方沒有必要講大話，卻被父母斥「你真係容易信人」，令學生大感傷心。網民都大讚學生所為，認為「社會好需要有你這種人」。 該學生前晚（16日）在facebook群組「名校Secrets」發帖，指其父親是一名的士司機，工作時拾獲一部iPhone手機，於是帶回家，商討如何處置。學生的母親隨即表示，她的手機開始壞，「攞嚟俾我用啦」。惟學生希望將手機歸還失主，於是出盡辦法說服家人，向他們稱「呢部手機係iPhone嚟架，機主set（設定）咗密碼，我地開唔到部手機，就算留係身邊都冇用架，都只會變成廢鐵 不如俾翻（返）人啦」。 學生最後說服了近20分鐘，父母終於同意將手機交還失主。學生聯絡失主後，對方隨即由旺角乘坐的士到學生位於青衣的寓所樓下。學生憶述，當時原本打算自己一人落樓，但母親則一同到樓下，認為她並非出於擔心，而是「因為想多個人多份酬勞」。失主接過手機後，向學生表示感謝，「我星期一就要飛啦，我部手機有好多客戶資料 我身上得翻（番）200蚊咋，真係好感謝你」。失主說畢便將200元給予學生作酬勞。 但學生與母親回家後，母親認為：「後生仔著得咁身光頸靚，又用成百幾蚊搭的士嚟青衣，身上點會得200蚊咁少啊，佢又話自己星期一要飛，好明顯係講緊大話啦」，父親亦表示「得個（嗰）200蚊，攞去鴨寮街賣都賺得多啲錢」。學生一度為失主反駁，「咁人地都話佢身上得翻（番）200蚊囉，對方都冇必要講大話啦」，結果卻被母親還擊，「人地（哋）手上有第二部手機啊，身上點會得咁少錢，連師奶都多錢過佢啦，你真係容易信人」。 學生在帖文中直言， 聽到其父母的說話感到不開心，亦感傷心，因為相信失主遺失手機，心情一定很焦急和擔心，沒有理由要編作故事呃他們，而且是失主主動提出搭車到學生寓所樓下取回手機，故此認為，「其實佢就算唔俾（畀）任何車馬費同酬勞，我都唔會怪佢」。 學生強調分享事件，並非反映自己的清高行為，亦相信每人都有貪心的時候，自己都不例外，所以明白母親想將手機據為己有，但最令他感傷心的，是因為母親獲報酬後竟嫌少，甚至懷疑失主存心說謊，「其實點解我地（哋）唔願意去相信對方，而係要質疑對方、懷疑對方，點解做人就一定要咁功利」，坦言「一諗到呢點就覺得好唔開心，甚至有想喊嘅感覺」，並問網民「大家係咪覺得我好『天真』，『好易相信人』同埋好傻呢？」 帖文至今獲超過1300人讚好，不少人都留言撑學生，鼓勵他要「保持一顆赤子之心不要放棄」、「擇善而固執，做個有道德修養嘅人，你所得到嘅好處未必係金錢嘅利益，而係贏得他人對你的一份尊重」，亦有人形容他「出於污泥而不染，社會需要你呢種人」，並認為幫人本身不應求回報，建議他提醒父母，拾遺不報屬犯法行為。