高海寧帶頭密封 張秀文大膽抗命 「禁色令」下考驗聽話指數

無綫發出「禁色令」勒令全台女藝員收起性感，不論在劇集、節目甚至個人網上平台都禁止暴露出鏡，八大性感花旦高海寧、李佳芯、麥明詩、黃心穎、王君馨、劉佩玥、張秀文、唐詩詠成為首批監察目標，當中以高海寧最為聽話，在台慶當晚「零性感」示人獲高層力讚！ 上周三(15日)無綫發出「禁色令」，向全台上下發出最新指引，不鼓勵節目中出現誇張女性身材及賣弄性感的鏡頭，拍攝劇集如涉及床上情慾戲份時，只會用「意會形式」交代，旅遊節目上拍攝游水及溫泉等鏡頭時，女藝員如穿上三點式必需加穿T恤，出埠拍外景亦會安排女導演同行，此外，亦希望女藝員在個人網上平台都盡可能收起性感。 聽教聽話一族 高Ling：我哋演員要配合 一年一度台慶的大日子，過往都是女藝員們性感大解放的好時機，「禁色令」下部分女星都收歛起來，差別最明顯莫過於年年都以性感裝成為台慶焦點的高海寧，今年高Ling收起性感，成為全晚最密實的女藝員，往年的波濤胸湧盛況不復見，只露出一邊纖腰，付出亦有回報，此舉獲得高層讚賞，聽教聽話的高Ling掀起「帶頭收胸」作用。 高Ling強調早已決定收起性感，大讚「禁色令」保護女藝人是好事：「對女藝人當然係好事，有時候大家未必識得Say No，公司收緊成件事，就等於幫我哋發聲，公司製作愈來愈用心，唔希望被性感或大膽情節，蓋過大家用心和努力。」 曾於劇集《法網狙擊》中背部全裸的高Ling掀起全城熱話，如今成為了絕響，她說：「而家可能唔需要露成個背，可以用其他拍攝手法交代，我又無好後悔拍攝呢一幕，只不過係公司政策唔同咗，我哋演員都會配合。」 李佳芯：唔需要谷得好勁 憑《踩過界》在《星和無綫電視大獎》中首奪視后的李佳芯，不時在劇集中有性感演出，成為新一代的性感花旦，擁有不少宅男粉絲，而她在台慶當晚亦十分聽話，以「封胸晚裝」示人，同樣支持公司的「禁色令」。李佳芯說：「台慶晚裝低少少、V少少都好正常，唔需要刻意收埋，適合場合就得，我覺得無禁令呢樣嘢，只要成件事出嚟舒服，自然同埋貼合主題，就唔會有唔舒服的感覺，例如拍旅遊節目浸溫泉，可以包毛巾，唔需要谷得好勁，我覺得公司意思就係咁。」 王君馨：適當調整係好嘅 過往在台慶都愛騷胸的王君馨，去年以超低胸透視短裙示人，今年配長裙只露出小香肩，事業綫半吋不露，絕對是「聽話」的一群。王君馨支持公司的新措施，她說：「我覺得適當調整係好嘅，公司同大家需要配合，例如強姦戲未必需要拍晒全個過程，用第二個拍攝方法都可以交代件事，女藝員係要尊重同保護，拍攝呢類型戲分，絕對係需要多啲女同事在場睇住，女演員放心啲，拍出嚟效果都好啲。」 我自行我「露」一族 黃心穎：每個人底綫都唔同 憑深不見底的事業綫成為宅男女神的黃心穎，台慶當晚以戰鬥格晚裝上場，若隱若現的上圍成為全場焦點，黃心穎大方承認自己的晚裝相當性感，自言不曾因「禁色令」左右她的決定，揀衫完全是因為個人喜好而選擇，她笑說：「今日呢個場合好適合着靚嘅晚裝，無論性感與否，每個人底綫都唔同，五十周年喎，每年得一、兩次着咁靚喎！Why Not？梗係趁後生，趁咁Fit嘅時候去着啦！」 對於自己成為首批監察目標？黃心穎相信指引主要是針對拍攝劇集及節目，始終是合家歡電視台，色情的畫面絕不適合，新措施下可避免女藝員在不情願的情況下接拍性感的戲分。 麥明詩：衣着表達個人自由 「十優港姐」麥明詩一向敢作敢為，在台慶當晚無視「禁色令」低胸大晒事業綫現身，她解釋貌似內衣的性感晚裝是一早借落，又認為「禁色令」是一個保護而不是限制，女士如何選擇衣着表達自己是個人自由，她直說：「每個人搵番自己嘅形象同路綫，性感唔需要刻意覺得係邪惡，靚嘅好嘅嘢，適當畀大家睇都係正常，既然呢啲係觀眾想要嘅嘢，點解要責怪滿足觀眾嘅人呢。」 麥明詩認為指引是保護她們，不需因壓力而穿着性感：「的確有時做嘢方面，擔心係一種壓力，做咗一啲自己唔係最舒服嘅嘢，依家大家都唔會迫自己做一啲唔想做嘅嘢。」 劉佩玥：公司想保護我哋 劉佩玥以大DeepV低胸晚裝成功在台慶夜成為焦點，Moon不覺得自己穿得太性感，只是為了尊重場合，她解釋：「公司指引係指唔好過分暴露，唔係指呢一個場合（台慶），我理解公司想保護我哋，唔想大家有唔好嘅聯想，或者唔想影響形象，我識得保護自己，自己亦需要保護自己。」 張秀文：無懼禁色令 台慶當晚最性感必定是張秀文，深DeepV開到肚臍，加上高衩裙，中門大開兼真空上陣，令不少同台的女藝員都嘩然。張秀文表示「禁色令」發出後，連日看過高層解釋，才決定不換另一不性感晚裝。 同樣成為首批監察女藝員的張秀文，問到有否被特別提醒不要太性感？她直說：「有嘅！知道我比較性感，其實未出指引前已經有人同我講㗎喇，嚟緊公司會制定呢樣嘢。」 如何理解「禁色令」？張秀文坦言：「我知道喺拍攝上，例如旅遊節目、拍劇，意識上健康啲。其實我出活動或者台慶，講真我着咩都好，你哋都話我性感㗎啦！如果着樽領嚟，我又覺得唔適合件事喎！睇咗咁多日咁多人講嘅嘢，我就覺得無懼囉。」 據了解，無綫亦希望女藝員在個人網上平台都收起性感，日前唐詩詠上載了一張晒長腿照片在社交平台後，有傳都收到口頭勸告，而「禁色令」暫時未影響到商演活動。