細仔出世搞到3女扭計行為倒退 林盛斌老婆呻：願風暴散去

林盛斌（Bob）與老婆成功追仔，B仔林道申（Jaye）都兩個多月大了，更有3位家姐陪伴成長。今日Bob在社交平台開心分享囝囝的可愛近照，讚Jaye靚仔咗。Bob嫂亦有感而發，專心留在家中湊4仔女的她深深體會家中的「風暴」，因為每次有新家庭成員，囡囡都會反常，出現行為倒退的問題。 Bob嫂發長文分享：「通常呢啲情況係因為細嘅出世，自然享受最多嘅關注，大嘅自然感覺被忽略，然後出現各種行為嘅反常。例如本來可以自行如廁卻突然話唔識，或是本來可以自行食完一整碗飯，現在卻一啖都要人餵，另外仲有最重要嘅情緒起伏不定。」她指3位囡囡都有不同的倒退行為，並教人向囡囡重新表現關注就可處理問題，不過3歲大的三家姐人細鬼大最難搞，並上載三家姐的扮瞓覺相，留言：「圖為三家姐在我餵奶時吵著要我陪她瞓覺，於是我請佢在旁邊等一等，我餵完奶十分願意陪佢。於是佢就喺旁邊擺著一副瞓覺嘅樣子。你哋睇下，呢個樣幾美好.....」 同時Bob嫂形容囡囡各種情緒爆發時，她的心情就如地幔裏的岩漿，「不能自制嘅滾熱流動（呢個形容幾好﹗來自大家姐的常識課本，她本星期測驗，剛剛和她溫習，連我都有得益）但願這場不能避免的風暴可以慢慢變得溫和且日漸散去。」